1989 წლის 20 დეკემბერს თბილისში დავიბადე. ისევე როგორც ბევრ ჩემს თანატოლს, მეც სკოლის ასაკიდანვე რთულ გარემოსთან შეგუება, პრობლემებზე დაფიქრება და “ნაადრევად გაზრდა” მომიწია. ბავშვობიდან დამოუკიდებლობა მიყვარდა და ვცდილობდი სამართლიანი ვყოფილიყავი. ამასთან ერთად ყოველთვის აქტიური, მხიარული, სპორტული, “ნიჭიერი მაგრამ ზარმაცი” ბავშვი ვიყავი.

სკოლის დამთავრების შემდეგ ილიას სახელმწიფო უნივერსიტეტში ჩავირიცხე და აქტიური ცხოვრებაც დაიწყო. 2009 წელს უკვე “ომგამოვლილი” მეორე კურსის სტუდენტი ვიყავი როდესაც ახალი ამბების სააგენტო “ინტერპრესნიუსში” და “რადიო პალიტრაში” დავიწყე მუშაობა. დღემდე “მედია პალიტრის” გუნდის წევრად ვრჩები.

ამჯერად უკვე ინტეგრირებული ნიუსრუმის კორესპონდენტი ვარ და “ინტერპრესნიუსისა” და “რადიო პალიტრის” პარალელურად “პალიტრა TV”- სთვისაც ვმუშაობ.

სამუშაო სფეროები ცხოვრების წესისა და ხასიათის მსგავსად მრავალფეროვანი მაქვს. მაინტერესებს პოლიტიკა, საზოგადოებრივი საკითხები, უცხოეთის ახალი ამბები და კულტურა, თუმცა ჩემი განსაკუთრებული ინტერესის სფერო სპორტი და ახალგაზრდული საკითხებია.