ჟურნალისტის პროფესიისადმი ჩემი სიყვარული ბავშვობიდან დაიწყო და ბავშვობიდანვე დავიწყე მცდელობა ჩემი ოცნება სისრულეში მომეყვანა. ვწერდი ყოველდღიურად, ვიღებდი ფოტოებს და მუდმივად ვცდილობდი ვყოფილიყავი მიმდინარე მოვლენების საქმის კურსში.

1998 წელს დავამთავრე თბილისის 36-ე საშუალო სკოლა, 2003 წელს -გრიგოლ რობაქიძის სახელობის უნივერსიტეტის, “ალმა-მატერის” ჟურნალისტიკის ფაკულტეტი და ამავე უნივერსიტეტთან არსებული თემურ ფაფერაშვილის სატელევიზიო შემოქმედებითი სახელოსნო.

სატელევიზიო სახელოსნოში სწავლის პერიოდი ჩემთვის განსაკუთრებულად საინტერესო იყო სატელევიზიო კუთხით გამოცდილების მიღების თვალსაზრისით.

ჟურნალისტური საქმიანობა 2003 წლიდან დავიწყე. ვმუშაობდი გაზეთ “ახალ ვერსიაში” კორესპონდენტად და შემდეგ ამავე გაზეთში ახალი ამბების რედაქტორად. 2007 წელს მუშაობა გავაგრძელე საინფორმაციო სააგენტო “ჯი-ეიჩ-ენში”. 2010 წლის თებერვლიდან ვმუშაობ “ინტერპრესნიუსში” და რადიო “პალიტრაში”.

“პალიტრა TV” ჩემთვის კიდევ ახალი გამოცდილებაა და სიამოვნებით და ენთუზიაზმით ვაკეთებ იმ საქმეს, რომელთანაც ბავშვობის სიყვარული მაკავშირებს.