პარლამენტის მისაღებში მოქალაქე გიორგი ჩიხლაძემ ცეცხლმოკიდებული დოკუმენტები შეყარა. ჩიხლაძის თქმით, პარლამენტის დაზიანება არ სურდა და ამ ქმედებით თვითმკვლელობის მცდელობა ჰქონდა განზრახული. ამასთან, როგორც ჟურნალისტებს პარლამენტის საქმის წარმოების დეპარტამენტის უფროსმა ხათუნა უზნაძემ განუმარტა, გიორგი ჩიხლაძემ პარლამენტს გასული წლის დეკემბერში ოპერაციის გაკეთების თხოვნით მიმართა. პარლამენტმა მისი დოკუმენტები რეაგირების მიზნით შრომის, ჯანმრთელობისა და სოციალური დაცვის სამინისტროში გადააგზავნა.

უზნაძის განმარტებით, მოქალაქემ დღეს ყოველგვარი ახსნა-განმარტების გარეშე საკუთარ დოკუმენტებს ცეცხლი წაუკიდა და მოქალაქეთა მისაღებში შეაგდო, რის შემდეგაც ცეცხლი მაგიდას მოედო.

გიორგი ჩიხლაძის თქმით, 7 წელი უდანაშაულოდ იხდიდა სასჯელს და შედეგად ჯანმრთელობის მდგომარეობა შეერყა. თვითმხილველების ინფორმაციით, გიორგი ჩიხლაძე პოლიციამ უკვე დააკავა.