ქობულეთში, თხილნარის სანაპიროსთან მეთევზემ ძველი წელთაღრიცხვის მეორე საუკუნის ნივთები აღმოაჩინა. ბათუმის არქეოლოგიური მუზეუმის დირექტორი ამირან კახიძე აღნიშნავს, რომ აღმოჩენილი ნივთები ჩაძირული გემის ნაწილებია: "ეს არის ძველებური გემის კიჩო, რომელზეც გამოკვეთილია დრაკონის ფორმის გამოსახულება. იქვე იყო გემის ანძა, რომელიც ფიჭვნარში არქეოლოგიურ ბაზაში ინახება. გარდა ამისა, გემის კორპუსის დეტალიც აღმოჩნდა. ასევე, დიდი ზომის ხელადა და ამფორაა აღმოჩენილი".

მისივე თქმით, მეთევზის მიერ სანაპიროდან 10 კილომეტრის დაშორებით 120 მეტრ სიღრმეში ნაპოვნ ძველი გემის ნაწილებით მსოფლიო წყალქვეშა არქეოლოგები დაინტერესდნენ: "კონტაქტები დავამყარეთ ვარშავის უნივერსიტეტთან და 15 ივნისს აპირებენ ჩამოსვლას გეოფიზიკოსები და აკვალანგისტები".

როგორც ამირან კახიძე აღნიშნავს, აღმოჩენის ადგილის ფიქსაცია გაკეთებულია და არქეოლოგიური სამუშაოები გაგრძელდება.