პუშკინის ქუჩის #11-13 მცხოვრები 35-მდე ოჯახი "თბილისის განვითარების ფონდის" შეთავაზებებს ეჭვქვეშ აყენებენ. მათი თქმით, ფონდი ბინების დანგრევას და მათ ნაცვლად ახალი საცხოვრებელი კორპუსის აშენების პირობას იძლევა, ნგრევის მიზეზად კი, ქალაქის იერსახის გალამაზება სახელდება. ფონდი ახალ წლამდე ახალი ბინების აშენებას დაჰპირდა, მანამდე კი, მოსახლეობას საცხოვრებლის უზურნველყოფისთვის 400 ლარიანი ბინების დაქირავება შესთავაზა.

თუმცა, მოსახლეობა აცხადებს, რომ ფონდს საკმაოდ საეჭვო წარმომავლობა აქვს, რის გამოც არც მისი დაპირებების სჯერათ. გარდა ამისა, ქუჩის მცხოვრებლები ვარაუდობენ, რომ შესაძლოა, ბინების დანგრევის შემდეგ ამ ადგილით არქეოლოგები დაინტერესდნენ, რაც ახალი მშენებლობის დაწყებას ხელს შეუშლის.
"ჩვენს ფეხქვეშ 1500-წლიანი ისტორიაა. თუმცა, ფონდის ხელმძღვანელი გოირგი საბანაძე გვეუბნება, რომ შენ მაგის შიში ნუ გაქვსო, ანუ ამბობს, რომ მე მერიაში რასაც გავაკეთებ, ეს შენი თვასატეხი არ არისო", - აცხადებს პუშკინის ქუჩაზე მცხოვრები ალექსანდრე სიხარულიძე. მისივე თქმით, მოსახლეობა შიშობს, რომ შესაძლოა, ისინი უბინაოდ დარჩნენ.