ყოვლადწმინდა სამების ლავრის სულიწმინდის სახელობის მოსანათლავ ტაძარში აჭარაში მცხოვრები 40 ადამიანი, მათ შორის, ლაზები და აფხაზები მოინათლა. ყველა მათგანის ნათლია სრულიად საქართველოს კათოლიკოს-პატრიარქია.

ახლად მონათლულები სხვადასხვა ასაკის არიან - არიან 3 წლამდე ბავშვებიც და 60 წელს გადაცილებულებიც. მონათლულები ჟურნალისტებთან საუბარში სიხარულს ვერ მალავდნენ, რომ დაუბრუნდნენ წინაპართა სარწმუნოებას.

ამასთან, ტაძრის მღვდელმსახურებმა საქართველოს მშვიდობისა და ერთიანობისათვის პარაკლისი გადაიხადეს.

პარაკლისის შემდეგ ნათლულები საქართველოს კათოლიკოს-პატრიარქმა, უწმინდესმა და უნეტარესმა ილია მეორემ დალოცა.