მიხეილ სააკაშვილმა 3 მაისს ფოთის ცენტრალური კლინიკური საავადმყოფო მოინახულა, რომელიც, ჰოსპიტალური სექტორის განვითარების პროგრამის ფარგლებში, სადაზღვევო კომპანიამ "ალდაგი ბი-სი-აიმ" ააშენა. პრეზიდენტთან შესახვედრად საავადმყოფოსთან მოსახლეობა შეიკრიბა. მათ შორის იმყოფებოდა ზაზა უგულავა, რომელსაც 4 წლის წინ ავტოკატასტროფისას ხერხემალი დაუზიანდა და ეტლით გადაადგილდება.

უგულავა ითხოვდა, არ ჩამოფარებოდნენ და პრეზიდენტთან გასაუბრების საშუალება მიეცათ, რომელიც უკვე საავადმყოფოს ეზოში იმყოფებოდა და მოქალაქეებს ესალმებოდა. თუმცა კონსტიტუციური უსაფრთხოების დეპარტამენტის ფოთის განყოფილების უფროსი ნიკო სურმავა და პრეზიდენტის დაცვა მას უკანდახევას სთხოვდნენ. კამათისას ზაზა უგულავამ ეტლი, რომელშიც იჯდა, ვეღარ დაიმორჩილა და გადაბრუნდა. შემთხვევის ამსახველ ვიდეომასალას ინტერნეტგამოცემა "tspress" ავრცელებს.

უგულავასთან პრეზიდენტი მართლაც მივიდა. "გავაკეთებთ, რაც შეგვიძლია", – განაცხადა მიხეილ სააკაშვილმა მისი თხოვნის მოსმენის შემდეგ.

ზაზა უგულავას სასწრაფო ოპერაციისა და რეაბილიტაციისთვის 50 ათასი აშშ დოლარია საჭირო. მისი თქმით, დახმარება მხოლოდ მერიისაგან აქვს მიღებული ერთჯერადი მატერიალური დახმარების სახით - 100 ლარი და შეშა, რომელსაც შეჭირვებულ მოსახლეობას მერია ზამთარში ურიგებს.

იხილეთ დედანი ინტერნეტგამოცემა "tspress"-ზე:
პრეზიდენტის დაცვასთან შელაპარაკებისას მოქალაქე ეტლიანად გადაბრუნდა