"დედობა ღვთისა და ერის წინაშე დიდი პასუხისმგებლობაა", - ოჯახში დედის როლსა და მნიშვნელობაზე სრულიად საქართველოს კათოლიკოს-პატრიარქმა, უწმინდესმა და უნეტარესმა ილია მეორემ დღეს, საკვირაო ქადაგებისას ისაუბრა.

"დღეს არის ხსენება მენელსაცხებლე დედათა. იმ დედათა, რომლებიც მუდამ იყვნენ მაცხოვართან, იმ დროსაც კი, როცა ხდებოდა ჯვარცმა უფლისა ჩვენისა იესო ქრისტესი. ისინი იყვნენ სულით და ხორცით უფალთან. დღეს მინდა ვისაუბრო იმის შესახებ, თუ რა არის ქალისა და დედის როლი ოჯახში. სამწუხაროდ, არის შემთხვევები, როცა ცოლი და ქმარი სცილდებიან ერთმანეთს, როცა დედას არ აქვს ის თვისებები, რომელიც უნდა ჰქონდეს ნამდვილ დედას. დედობა ესაა დიდი პასუხისმგებლობა ღვთისა და ერის წინაშე", - აღნიშნა უწმინდესმა.

ამასთან, უწმინდესმა ცოლებს ქმრების მორჩილებისკენ მოუწოდა. "ახლა მიღებულია ასეთი ტერმინი, რომ ცოლი და ქმარი თანასწორუფლებიანია. საღმრთო წერილი ამბობს, რომ ოჯახში მთავარი არის ქმარი. ოჯახი ესაა ერთი სხეული და არ შეიძლება ერთ სხეულზე იყოს ორი თავი. ეს შეუძლებელია. ბედნიერია ის ოჯახი, სადაც დედა და ცოლი სწირავს თავს ოჯახს, ზრდის თავის შვილებს, ზრდის სარწმუნოებრივად", - აღნიშნა უწმინდესმა.

ქადაგების ბოლოს ილია მეორემ 4 სასულიერო პირი დააჯილდოვა და ისინი სხვადასხვა ხარისხში აიყვანა, ასევე, რამდენიმე ქართული გვარი დალოცა.