კოალიცია "ქართული ოცნების" პრესსპიკერ მაია ფანჯიკიძის აზრით, შინაგან საქმეთა მინისტრად ბაჩო ახალაიას, თავდაცვის მინისტრის მოადგილედ კი მისი ძმის, დათა ახალაიას დანიშვნა ხელისუფლების მხრიდან საზოგადოებისადმი კონკრეტულ გზავნილს შეიცავდა.

"ის სახელი, რაც დათა ახალაიას აქვს, ყველასთვის ცნობილია. მას უკავშირდება რამდენიმე გახმაურებული საქმე და მათ შორის, ციხის ბუნტი. თავისთავად ის ფაქტი, რომ ხდება ბაჩო ახალაიას და მისი ძმის გაძლიერება, არის მიმართული იქითკენ, რომ ხალხს უთხრან – გეშინოდეთ, რადგან ისინი არაფერს მოერიდებიან. ალბათ, მათი გადანაწილება ახალ თანამდებობებზე სწორედ ამ გზავნილს შეიცავდა ხელისუფლების მხრიდან", - განაცხადა მაია ფანჯიკიძემ ტრადიციულ პრესკონფერენციაზე.