"საქართველოს გზა" სოსო ქიმერიძის გარდაცვალების ფაქტის გამოძიებას და დამნაშავე პოლიციელების დასჯას მოითხოვს. "საქართველოს გზის" წარმომადგენელმა, მამუკა ბალიაშვილმა, დღეს გამართულ პრესკონფერენციაზე განაცხადა, რომ სოსო ქიმერიძის პოლიციაში გარდაცვალებასთან დაკავშირებით აშკარად იკვეთება პოლიციის თანამშრომლების ბრალეულობა. მისი განცხადებით, ქიმერიძეს აღენიშნება სხეულზე მძიმე დაზიანებები, რაც იმაზე მიუთითებს, რომ მასზე განხორციელდა ფიზიკური ზეწოლა, რაშიც კონკრეტული პოლიციელები არიან დამნაშავეები.

ბალიაშვილი მიიჩნევს, რომ უნდა მოხდეს ამ ფაქტის ობიექტური გამოძიება და დაისაჯონ დამნაშავე პოლიციელები. მისი განცხადებით, შინაგან საქმეთა სამინისტროს ვერსიას ვერანაირად ვერ დაეთანხმება, სადაც საუბარია კიბეებიდან ქიმერიძის გადავარდნაზე. ის დაზიანებები, რაც მას სხეულზე აღენიშნება, არანაირად არ მიუთითებს შინაგან საქმეთა სამინისტროს ვერსიის დამაჯერებლობაში.

ბალიაშვილის განცხადებით, იმ შემთხვევაში თუკი შინაგან საქმეთა სამინისტროს ვერსიას დავუჯერებთ, მაინც პასუხისმგებლობა ეკისრება პოლიციის კონკრეტულ თანამშრომლებს, ვინაიდან დაკავებული მათ ხელში იყო და ამ დროს მოხდა მისი გარდაცვალება.