შემოსავლების სამსახურმა ფიქსირებული გადასახადის ოდენობა მცირე ავტოსახელოსნოებისთვისაც განსაზღვრა. როგორც შემოსავლების სამსახურის მომსახურების დეპარტამენტის უფროსმა ვასილ გედევანიშვილმა ფინანსთა სამინისტროში გამართულ პრესკონფერენციაზე განაცხადა, დასაბეგრი საქმიანობის სახეს წარმოადგენს ავტომობილების ტექნიკური მომსახურება, რემონტი და აღნიშნული მომსახურებისთვის განკუთვნილ ფართზე გაწეული სხვა მომსახურება.

მისი თქმით, გადასახადის განაკვეთი ერთი ავტომობილის მომსახურებისთვის განკუთვნილ სამუშაო ადგილზე 100 ლარია, ხოლო იმ შემთხვევაში, თუ ცალსახად ვერ დგინდება, რამდენი ავტომობილის მომსახურებისთვისაა განკუთვნილი სამუშაო ადგილი, ყოველ 40 კვ.მ. ფართზე გადასახადი 100 ლარით განისაზღვრა.

გედევანიშვილის განცხადებით, ფიქსირებული გადასახადით ისარგებლებენ ის მცირე მეწარმეები, რომლებიც ეწევიან არა იურიდიულ, არამედ ფიზიკური პირის მომსახურებას და არ არიან დღგ-ს გადამხდელები.

ამასთან, ფიქსირებულ გადასახადზე გადასვლა ნებაყოფლობითია და თავად მეწარმეს აქვს არჩევანის საშუალება, გადასახადის განაკვეთის ოდენობა კი კონკრეტული სფეროების მიხედვით ეტაპობრივად დადგინდება.

გედევანიშვილის ცნობით, ფიქსირებული გადასახადი 3 თვის წინ ამოქმედდა და 50 ლარით განისაზღვრა გადასახადის განაკვეთი თონეებისა და სალონებისთვის. გადასახადის ალტერნატიული ფორმა საქართველოს ყველა რეგიონში მოქმედებს და უკვე 1 093 სერთიფიკატია გაცემული.