"ალდაგი ბი-სი-აი" "იმედი ელ"-ის აქციების 85%-ის მფლობელი გახდა. აღნიშნული ინფორმაცია ჟურნალისტებს დღეს სადაზღვევო კომპანია "ალდაგი ბი-სი-აი"-ს გენერალურმა დირექტორმა ნიკა გამყრელიძემ და "იმედი ელ"-ის აღმასრულებელი დირექტორის მოადგილე ნიკოლოზ ჩიხლაძემ მიაწოდეს. გამყრელიძემ ისიც აღნიშნა, რომ დანარჩენი 15%-ის შესყიდვაზე აქციონერებთან მოლაპარაკება მიმდინარეობს.

 

გამყრელიძის თქმით, ეროვნული ბანკის ანგარიშის თანახმად, 2011 წლის მესამე კვარტლის მონაცემებით, სადაზღვევო კომპანია "ალდაგი ბი-სი-აი" ბაზრის 17,1%-ს ფლობს, ხოლო "იმედი ელ"-ი 16,3%-ს.

"იმედი ელ"-ის აღმასრულებელი დირექტორის მოადგილემ ნიკოლოზ ჩიხლაძემ განაცხადა, "იმედი ელ"-ის აქციების გაყიდვა ფინანსურ პრობლემებს არ უკავშირდება და მათთვის მისაღები აღმოჩნდა "ალდაგი ბი-სი-აი"-ს შეთავაზებები. გაერთიანების შედეგად კომპანიის საცალო მომხმარებელთა რაოდენობა 420 000-ს გადააჭარბებს.

ამ გაერთიანების შედეგად "ალდაგი ბი-სი-აი" სადაზღვევო ბაზარზე ყველაზე დიდი კაპიტალის მქონე კომპანია გახდება.